Jeugdbal 

Zaoterdig haije we ôs eige Jeugdbal in de Gatserie. Dit bal waas ûn daverend succes. Met ûn geweldig schoeën optreaje van de Wild Things! Um kiepevel van te kriege zal ik ôw zegge! Dûr waas zelfs ûn väörprogramma van de meidenband The Sweetbeats, wat ût pletje compleet makte. Tussendaor waort de meziek verzäörgt doar ôs eige DJ’s z.v. De Plaarzek, ût fist koos nit mieër stuk! Dûr waas ûn geweldige ambiance van rock nummers en carnvalsmeziek, de koos aan de gezeegte zeen det eederieën plezeer haij! Ût waas gezellig druk en ôk mochte weej ût gezelschap van de boorebroeluf nog verwelkoame. Ik denk det we wèr terug konne kieke op ûn geslaagd bal!

Ût bestäör

Jeugdprinsentreffen Hout Blierick

Zoeë, wèr un wiekend väörbeej met väöl joeks en meziek!

Vriedig zien weej met de ganse raod, bestäör en ût ganse gezelschap van de jeugd in de Kroeënenberg nar Hout-Blierick gegaon. Um 7 oor vertrokke we met z’n allen in de bus. Op nàr un moije activiteit, genaamd ût Jeugdprinsentreffe.

In de bus waort dûr al ûn begin gemakt met de polonaise en beej aankomst beej CV de Poerker in Hout-Blierick zooge weej de polonaise al doar de zaal gaon, wat ûn gezelligheid! De ganse raod heat ûn schitterend flutje gekreage wao ze vervolgens de ganse aovend plezeer van hebbe gehad. Eeder trio van de aanwezige verieëniginge heat zich konne väörstelle, sommige met ûn schitterend stökske meziek, angere met ûn daverend optreaje van äör dansgarde. Zoeë ôk Zaerum, noa un moij wurdje van prins Tom II hèt de dansgarde van Zaerum ûnne oeëgverblindende show weggegeave. Applaus vûr deaz megjes. Ût waas ûnne schoeëne aovend waorbeej doar menigieën wèr ûnne polonaise is geloeëpe. Um kwart vûr twelluf waas ût helaas zoeë wieëd dèt weej wèr richting Zaerum derp vertrokke, wèr met ûnne schoeëne herinnering durbeej. Met dank aan CV de Poerker vûr dit geweldige fist!

Ût bestäör

Jeugdbal in ût Aezelsrieëk              

Op zaoterdig 4 fibberwari a.s. is ût wèr zoeëwieëd. Dan vingt ût jaorlikse Jeugdbal plats van carnavalsverieënging ût Ezelsköpke in de Gatserie in Zaerum.

De jeugdcarnaval in Zaerum organiseert dit carnavalsbal vûr jongere oêt Zaerum en umstreake (vanaaf 12 jaor). Net zoeëwie väörgaonde jaore stieët ût bal in ût teike van un thema, dit jaor is dèt Western.

Un bandje is op zo’n bal nit misplatst. Dit jaor hèt de organisatie gekoaze vûr un band bekend van radio en tillevisie, namelijk The Wild Things. Sáme met de Plaarzek DJ’s on Tour zulle zeej deaze aovond wèr tot un succes máke! Vanaaf 19.30 uur is de Gatserie geäöpend, dig bis dûr toch zeaker beej?!!

Ût bestäör